MOSKETTA

MOSKETTA

genus armorum hodie in Europa usitatissimum; tubus ferreus est, quô, pulveris pyrii intus constipati accensique vi maximâ, glans plumbea inclusa exploditur et obvium quodque transadigit. Ei occasionem praebuit arundo puerorum ex sambuco excavata de qua infra dicemus. Sed et inventa est non pridem, inquit Athanasius Kircher. in Magnete suo, ratio eâ violentiâ comprimendi intra canalem aeris, ut in mult is praestet maiorem, quam ipsae moskettae effectum. Et quidem dividit is Aeolium hunc sclopum in tres partes seu loculamenta; quorum primum inservit onerando sclopeto, alterum est aeris compressi receptaculum; tertium fistula, quae proiectilia excutit. Trusillum addit seu pistillum cylindraceum, canali ita quadrans, ut omnem aeris elabendi occasionem intercludat, idque coriô contegit; tum plasmation. Videas in expositione aerem caeruleum, quem vel impetus, vel materia fistulae metallaris fecerit. Auctor Anonymus Sinae et Europae c. 34. In Cimeliarcho Magni Hetruriae Ducis ostendi Moskettam, ex solido auro, muneri aliquando Imperatori cuidam missam, memorat Iac. Sponius Itinerar. l. 1. p. 61. Vide quoque supra, ubi de Bombardis.